“Facebook” сүлжээ ашиглан охид, эмэгтэйчүудийг мэхлэн эрхшээлдээ оруулж гэмт хэрэг үйлдэх тохиолдол гарах болсон. Сүхбаатар аймгийн харьяат насанд хүрээгүй хөвгүүн охид, эмэгтэйчүүдийн 1000 гаруй нүцгэн болон хагас нүцгэн зураг цуглуулж заримынх нь охидын зургийг “Интернэтэд тавина” гэж сүрдүүлсэн гэмт хэргийг шүүхийн байгууллага саяхан шийдсэн.

Тэгвэл энэ төрлийн гэмт хэргийг цагдаа нар дахин илрүүлжээ. Цахим сүлжээнд “Чингис Өнөртүвшин” хаягтай Ч.Өнөртүвшин гэх залуу охид, бүсгүйчүүдийг ийм маягаар сүрдүүлж бэлгийн дур хүслээ хангадаг байсныг Эрүүгийн цагдаагийн газрын Кибер гэмт хэрэгтэй тэмцэх хэлтэс тогтоож эрүүгийн хэрэг үүсгэжээ. Тэрээр охидыг ” фотомодель” болгоно хэмээн студидээ аваачин нүцгэн зургийг нь авч дараа нь цахим сүлжээнд тавина хэмээн сүрдүүлдэг байжээ.

Цагдаа нар энэ хэргийн хохирогчоор гурван эмэгтэйг тогтоогоод байна. Тэдний дунд ерөнхий боловсролын сургуулийн сурагч байгаа аж. Хэргийг Чингэлтэй дүүргийн цагдаагийн газарт шалгаж байна. Ч.Өнөртүвшин нь язгуур урлагийн “Хөгсүү” чуулгыг тэргүүлдэг аж.

 Б. Энх
Эх сурвалж: Jirgee.mn