Нийслэлд үйл ажиллагаа явуулж байгаа “Да хүрээ”, “Өгөөмөр”, “Даймонд”, “Монбэт”, “Дако”, “Старт”, “Техник импорт”, “Цахлай”, “Буян хурах”, “Сутай Буянт” гэсэн автомашин, түүний дагалдах хэрэгсэл худалдаалах худалдааны төвүүдийг Сонгино-Хайрхан дүүрэгт нүүлгэх шийдвэрийг Нийслэлийн иргэдийн төлөөлөгчдийн хурлын тэргүүлэгчдийн 2014 оны гуравдугаар сарын 21-ний өдрийн 29 дугаар тогтоолоор баталсан. Тогтоолд ”Авто худалдааны цогцолбор”-ыг байгуулж дээрх худалдааны төвүүдийг нэгдсэн байдлаар ажиллуулахаар төлөвлөж  2014 оны арванхоёрдугаар сарын 1-ний өдрөөс нийтийн эзэмшлийн зам талбай, бусад зам орчмын ил задгай зогсоол, талбайд автомашин, тээврийн хэрэгслийн сэлбэг, хэрэгсэл худалдан борлуулахыг хориглохоор шийдвэрлэсэн.
Тиймээс задгай талбайд автомашин, сэлбэгийн худалдаа эрхлэгчид, Монголын худалдаа аж үйлдвэрийн танхимын дэргэдэх “Захуудын үйл ажиллагааг дэмжих зөвлөл” Шударга өрсөлдөөн хэрэглэгчийн төлөө газарт гомдол гаргаж, гомдлын дагуу шийдвэрийг хянан шалгаж, үр дүнгээ өнөөдөр тайлагналаа.

Нийслэлийн зүгээс тавьсан автозамын ачааллыг бууруулах, агаарын болон хөрсний бохирдол үүссэн, стандартын шаардлага хангаагүй гэх шалтгаануудыг ШӨХТГ-аас мэргэжлийн байгууллагуудын дүгнэлтээр тогтоогдоогүй, үндэслэлгүй, аж ахуй эрхлэхийг хязгаарласан, хориглосон шийдвэр болсон, Монгол Улсын хууль, дүрэм, журам, стандарт зөрчсөн болохыг тогтоогоогүй гэж үзэж байгаагаа илэрхийллээ.

Мөн НИТХ-ын уг шийдвэр нь Өрсөлдөөний тухай хуулийн хэд хэдэн заалтыг зөрчиж байна гэж үзэж Улсын байцаагчийн дүгнэлтийг Нийслэлийн иргэдийн төлөөлөгчдийн хуралд хүргүүлэхээр болжээ.