Э.ГАНЦЭЦЭГ

Сэтгэл байвал юуг ч хийж, бүтээж болдгийн жишээ болсон Монголын мянга мянган хөгжлийн бэрх­шээлтэй иргэдийн төлөөлөл, Монголын паратаек­вондогийн баг тамирчид Бүгд найрамдах Турк улсын Самсун хотноо өнгөрсөн сарын 17-19-нд болсон “Паратаеквондогийн дэлхийн аварга шалгаруулах VI тэмцээн”-д амжилттай оролцож алт, мөнгө, хүрэл медаль хүртжээ. Дэлхийн аваргын тэмцээний араас манай тамирчид ОХУ-ын Сочи хотод болсон “Дэлхийн Хөгжлийн бэрхшээлтэй иргэдийн их наадам”-д анх удаа энэ төрлөөр оролцож гурван хүрэл, нэг мөнгөн медальтай эх орондоо ирсэн байна.
Ингээд тэмцээний тухай болоод паратаеквондогийн тамирч­дад тулгамдаж буй асуудлаар Монголын паратаеквондогийн холбооны ерөнхий нарийн бичгийн дарга Л.Отгонбаатартай ярилцлаа.

-Медалийн хуртай ирсэнд баяр хүргэе. Монголд таеквондогийн спортоор тууштай хичээллэдэг хэчнээн тамирчин байдаг юм бэ?
-Сонирхож хичээллэдэг 20 мянга гаруй тамирчин байдгаас тууштай хичээллэж байгаа нь таван мянга.

-Тэднээс энэ спортоор мэргэжлийн түвшинд тэмцээн уралдаанд оролцож байдаг тамирчид нь?
-Одоогийн байдлаар манай улсад 20 хүрэхгүй тамирчин байна.

-Бүгд эрэгтэй тамирчин уу?
-Тийм. Одоогоор эмэгтэй тамирчин байхгүй. Гэхдээ эмэгтэй хүн хичээллэе гээд ирвэл бидний зүгээс татгалзах зүйл байхгүй.

-Паратаеквондогоор хи­чээл­­лэх иргэдэд тодорхой шалгуур тавьдаг уу?
-Паратаеквондогоор хи­чээл­­лэх тамирчдад тавигд­даг шаардлага бол хөл бүрэн бүтэн байх юм. Харин гаргүй байж болдог. Ер нь, хөгжлийн бэрхшээлтэй иргэд өөрсдийгөө гололгүй спортын бүх төрлөөр хичээллэх боломжтой.

-Пара тамирчдын хувьд олон бэрхшээл байдаг байх?
-Тэгэлгүй яахав, хамгийн наад зах нь хувцас солих. Тэмцээн уралдаанд явахад гэр бүлийнхнээс нь хүн авч явах зардал мөнгөний боломжгүй учраас дасгалжуулагчид бүх л ажлыг хийдэг. Хэдийгээр баг тамирчдад эмч байх ёстой ч санхүүгийн асуудлаас болоод эмч ажиллуулж чадахгүй, эмчгүй л байна даа.

-Тэмцээн уралдаанд явах зардлаа хэрхэн зохи­цуулж байна вэ?
-Ихэвчлэн хувиасаа гар­гаж оролцдог. Сүүлийн явсан хоёр тэмцээний зардлыг “Петровис”, “Магнай трейд”, Туркийн иргэний агаарын тээв­рийн компаниас ивээн тэтгэсэн. Энэ дашрамд ивээн тэт­гэсэн компаниуддаа баярлалаа гэж хэлье.

-Төр засаг, харьяа яамнаас дэмжлэг туслалцаа үзүүлэх юмуу?
-Улсын зүгээс хөрөнгө сан­хүүгээр ч юмуу ямар нэг байдлаар тусламж үзүүлж байгаагүй. Тамирчид маань бүгд улсаас олгодог халам­жийн тэтгэмж болох 126000 төгрөгөөр л амьдарч, тив дэлхийн тэмцээн уралдаанд оролцож байна шүү дээ.

-Ирэх онд болох Ази тивийн аваргад бэлтгэж байгаа байх?
-Тиймээ, “Ази тивийн паратамирчдын аварга шалга­руулах” тэмцээнд оролцохоор бэлтгэлээ базааж байна. Бидний уралдаан тэмцээн бү­рийг алгасалгүй оролцож байгаагийн хамгийн гол зорилго бол 2020 онд Токио хотод зохиогдох Олимпын наадамд оролцож амжилт үзүүлэх юм.