Улсын Филармони энэ оны нэгдүгээр улиралд Монголын хөгжмийн зохиолчдын суут бүтээлээс толилуулах “Монгол уран бүтээл” төслийг амжилттай хэрэгжүүлж хөгжим судлаач, сонирхогчдын талархлыг хүлээсэн. Харин энэ удаад дэлхийн хөгжмийн зохиолчдын суут бүтээлүүдээс хүргэх “Сонгодог хөгжим” төслийн уран бүтээлүүдийг үзэгч түмэндээ бэлэг болгон барихаар зэхэж энэ удаагийн улирлын хөтөлбөрөө танилцуулсан өдөрлөгөө тун сонирхолтой арга барилаар хийсэн нь хүмүүсийн анхаарлыг татаад зогсохгүй магтаалын үг харамгүй сонсов. Тодруулбал, өнгөрсөн бямба гарагт Улсын их дэлгүүрт зохион байгуулж, энэ үеэр Баянмонгол жазз найрал болон дуучдын төлөөлөл ая дуугаа өргөсөн юм.

Мөн үйлчлүүлэгчдэд энэ улирлын тоглолтын хөтөлбөртөө танилцуулж “Сонгодог хөгжим” төслийн тухай мэдээлэл хүргэснээс гадна“Nomin fashion” үзэсгэлэн худалдааны эхний азтай худалдан авагчдад тоглолтын урилгаар бэлэг барилаа. Тэд энэ удаад үзэгчдэдээ дараахь тоглолтуудаар бэлэг барих нь. Морин хуурын чуулгын хамт олон энэ сарын 15-нд “Дэлхийн хөгжмийн дээжис”, Баянмонгол жазз найрал хөгжим 16-нд “Coconuts baby”, Симфони найрал хөгжмийн хамт олон 17-нд “Дэлхийн хөгжмийн дээжис” тоглолтоо сонирхуулахаар бэлтгэжээ.