Дэлхийн цагаан таягтны өдөрт зориулсан сонирхолтой тоглолт өнөөдөр “Улаанбаатар палас”-ын их танхимд болох гэж байна. Энэ тоглолтын гол зорилго нь удахгүй болох паралимпын эрх авахын төлөө Монголын хараагүй иргэдийн баг тамирчдыг Азийн хонхтой бөмбөгийн аварга шалгаруулах тэмцээнд оролцоход нь хувь нэмэр оруулах аж. Учир нь, манай баг тамирчид бэлтгэл сайн базаасан ч зардлын мөнгөө олж чадаагүй байна.
Тиймээс Монгол Улсын гавьяат жүжигчин Д.Жаргалсайхан, Т.Ариунаа, Л.Чаминчулуун, С.Хүрэлбаатар, Ч.Амаржаргал нараар ахлуулсан дуучид тэдэнд тусламжийн гараа сунгаж хандивын тоглолт хийж, орлогоороо замын зардлыг нь шийдвэрлэхээр болжээ. Уг тэмцээн ирэх сарын 5-13-нд БНХАУ-ын Ханьжоу хотод болно. Манай баг тамирчид дасгалжуулагч, эмч, орчуулагч гэсэн нийт 18 хүний бүрэлдэхүүнтэй явах юм байна.