Дуучид дотроо "Халхын Том Баттөр" хэмээн хүндлэгддэг дуучин Б.Баттөр хүндээр өвджээ. Нэгэн цаг үед Монголын сонгодог урлагийн төлөөлөл болж явсан, СУИС-ийн дуулаачийн багш Монгол Улсын Соёлын тэргүүний ажилтан тэрээр тархины хүнд хагалгаанд орохоор болсон байна. Балжиннямын гэхээс Сэлэнгийн Баттөр гэдгээр нь илүүтэй таньдаг түүнийг гавьяат жүжигчин У.Далантай “Сайхан хоолойтой, дүрд хувирч чаддаг, сайн жүжиглэдэг дуучин. “Ламбугайн нулимс” дуурийн Лодонгийн ариг Баттөр шиг сайн дуулсан хүн одоогоор алга” хэмээн тодорхойлж байсан удаатай.

Урлагт эргэж буцалтгүйгээр 22 жил зүтгэж буй Төрөөгөө өвчнөөс нь ангижруулъя хэмээн өнөө цагийн Монголын урлагийн сор болсон уран бүтээлчид гар бие, сэтгэл нийлэн "Том Төрөөдөө урам хайрлая" тоглолт хийхээр зэхжээ. Рок, поп, нийтийн дууны “акулууд” оролцох тоглолт ирэх сарын 1, 2-нд болно.