Тайваньд болсон Олон улсын ой тогтоолтын аварга шалгаруулах анхдугаар тэмцээнд эх орноо төлөөлөн оролцсон “Оюун ухааны академи”-ийн баг тамирчид 20 алт, дөрвөн мөнгө, 14 хүрэл медаль хүртэж бахдам амжилт үзүүллээ. Тэмцээний төрөл тус бүрт эхний гурван байр шалгаруулахаар 70 медаль багцалснаас манай тамирчид 38-ыг хүртэж багаараа тэргүүн байр эзэлсэн юм.

Тэмцээнд олон улсын их мастер Ө.Сэнгэсамдан, их мастер С.Цогбадрах, өсвөрийн олон улсын аварга Т.Энхжин, ОУХМ А.Анударь, М.Төгөлдөр, Э.Ялгуун, Ш.Шижир-Од, М.Тамир нар гурван насны ангилалд 12 орны 81 тамирчинтай оюун ухаанаа уралдуулсан байна. Насанд хүрэгчдийн ангилалд өрсөлдсөн их мастер С.Цогбадрах тэмцээний хамгийн хүнд төрөл болох “дуут цифр”-т өөрийн эзэмшиж байсан дэлхийн дээд амжилт болох 390 цифрийг 42-оор ахиулж, 432 болгон шинэчлэн тогтоов. Харин өсвөр насны ангилалд олон улсын аварга Т.Энхжин “багц хөзөр” төрөлд их мастер Э.Пүрэвжавын эзэмшиж байсан дэлхийн дээд амжилтыг шинэчилж, ангилалдаа тэргүүлсэн. Мөн М.Тамир бага насны ангилалд аваргалж амжилтаа ахиулжээ.

Ирэх сард манай тамирчдыг 24 дэх удаагийн ой тогтоолтын дэлхийн аварга шалгаруулах тэмцээн хүлээж байна.