Сар бүр Олон улсын шатрын холбооноос шатарчдын чансааг шинэчлэн гаргадаг билээ. Тэгвэл энэ жилийн жагсаалтаар манай улсын шатарчдын чансааг “Шунхлай групп”-ийн тамирчин, Олон улсын их мастер Б.Гүндаваа 2506 оноогоор тэргүүлжээ.

Улс бүрийн шилдэг 10 шатарчныг дунджаар байр эзлүүлэхэд манай улс 172 орны 58 дугаарт бичигдсэн байна. Энэ үзүүлэлтээр манай улс өмнөх сарын үзүүлэлтээ хадгалж чадлаа.

ОУИМ Б.Гүндаваа өнгөрсөн сард Малта улсад болсон Олон улсын тэмцээнд тэргүүн байр эзэлж, чансаагаа 7,5 хувиар ахиулсан юм. Харин шилдэг эмэгтэй 100 шатарчны жагсаалтад Олон улсын мастер, эмэгтэйчүүдийн Олон улсын их мастер Б.Мөнгөнтуул 38 дугаарт, ОУМ Д.Номин-Эрдэнэ 50 дугаарт бичигдсэн байна.