“Туурайн Төвөргөөн-2012” фестивалийн нээлт өчигдөр Монголын түүхийн музейд болов. Нээлтийн үеэр “Туурайн Төвөргөөн” наадмыг үүсгэн байгуулагч Герман дахь Монголын соёлын төвийн захирал С.Бадамхоролоос зарим зүйлийг тодрууллаа.

-Наадмын нээлтийн талаархи сэтгэгдлээ хуваалцахгүй юу?
-“Туурайн төвөргөөн-2012” олон улсын наадам энэ жил нартай сайхан өдөр нээлтээ хийлээ. Энэ жил 14 дэх удаагаа зохиогдож буй нь энэ. Монголынхоо гайхамшигтай ардын урлагийн төлөөлөгчдөө дэлхийд алдартай бүтээлчидтэй уран нэгтгэдгээрээ онцлог гэдгийг хүмүүс хэдийнэ мэдэх болсон.

-Энэ жилийн хувьд ямар маршрутаар аялал үргэлжлэх бол?
-Бид Төмөр замын тээвэр жуулчлалын төвтэй хамтран зохион байгуулж байгаа. Нэг ёсондоо төмөр замаар явах юм. Аялал Дорноговиос эхэлж Хархорум, Элсэн тасархай, Хөгнө хан Уул зэрэг газраар үргэлжилнэ.

-Олон орны хөгжимчид ирж оролцдог гэдгээрээ бас онцлогтой. Ингэхэд гадаадын ямар улс орноос төлөөлөгчид ирсэн байгаа вэ?
-Өмнө нь ирж оролцож байсан хүмүүс дээр нэмэгдээд шинээр Герман, Австри, Швейцарь, Англи, Франц, Бразиль зэрэг орноос хүмүүс ирсэн байгаа. Монголын шинэ залуу уран бүтээлчдийг дэмжих зорилгоор өмнөх жилүүдийн бүрэлдэхүүнээ өргөжүүлсэн. Энэ жил ерөнхийдөө өргөн бүрэлдэхүүнтэй аялах нь.