Америкийн дуучин Леди Гага “Америкийн аймшгийн түүх” аймшгийн цуврал кинонд бүтээсэн дүрээрээ “Богино цуврал киноны буюу телевизэд зориулсан киноны шилдэг эмэгтэй жүжигчин” төрөлд “Алтан бөмбөрцөг” шагналын эзнээр тодорлоо. Энэ тухай телевизийн “NBC” суваг мэдээлжээ.

Драмын төрөлд шилдэг киногоор “Амилсан чөтгөр” кино “Алтан бөмбөрцөг”шагналыг хүртсэн бол уг киноны гол дүрд тоглосон Леонардо Ди Каприо “Драмын төрөлд шилдэг эрэгтэй жүжигчнээр” тодорсон байна. “Амилсан чөтгөр” киног найруулагч Алехандро Иньярриту шилдэг найруулагчийн шагналыг хүртжээ.

“Драмын төрөлд шилдэг эмэгтэй жүжигчний” шагналыг “Өрөө” киноны гол дүрийг бүтээсэн Бри Ларсон хүртсэн байна.

“Шилдэг инээдмийн болон мюзикл киноны” төрөлд уг шагналыг Британийн найруулагч Ридли Скоттын бүтээсэн “Ангарагийн иргэн” зөгнөлт кино хүртжээ. "Инээдмийн шилдэг эрэгтэй жүжигчний" шагналын эзнээр энэ кинонд NASA-гийн нисгэгчийн дүрд тоглосон Мэтт Деймон тодорсон байна. Харин инээдмийн төрөлд шилдэг эмэгтэй жүжигчний шагналыг Женнифер Лоуренс “Жой” кинонд бүтээсэн дүрээрээ хүртжээ.

"Гадаад хэлээрх шилдэг кино" шагналыг Унгарын кино найруулагч Ласло Немашагийн бүтээл "Саулын хүү" кино хүртлээ.

“Алтан бөмбөрцөг” шагналыг 1944 оноос хойш жил бүр олгож байгаа юм. Уг шагналын эздийг Холливудад ажилладаг олон улсын 90 орчим сэтгүүлч бүрэлдэхүүнд нь багтдаг Гадаадын хэвлэлүүдийн холбооноос тодруулдаг байна.