Монгол үндэсний анхны мэргэжлийн бүжгийн жүжиг болох “Уран хас”-ыг тэртээх 1973 онд хөгжмийн удирдаач Ж.Чулуун зохиож, тухайн оныхоо арванхоёрдугаар сарын 30-нд түүний төрсөн ахын хүүхэд болох Урлагийн гавьяат зүтгэлтэн, удирдаач Ч.Жамсранжав гуай анх удирдаж, үзэгчдийн хүртээл болгож байсан гэдэг.

Өдгөө УДБЭТ-ын тайзнаа 43 дахь жилдээ тасралтгүй тавигдаж буй хоёр бүлэг, гурван үзэгдэлт балет энэ сарын 23, 24-нд үзэгчдэд хүрэх нь. Ардын жүжигчин, Төрийн шагналт хөгжмийн зохиолч Ж.Чулуун гуай энэхүү балетаар ард түмний мэргэн цэцэн ухаан, шинийг бүтээх хүсэл тэмүүлэл, хуучныг шүтэн бишрэгч хоёрын тэмцлийг урнаар ёгтлон харуулсан байдаг билээ.