Япон улсад болж буй 2016 оны засмал замын дугуйн Азийн аварга шалгаруулах тэмцээний хоёр дахь өдөр буюу өчигдөр залуучуудын ангиллын цуваа гараатай 33.6 км зайд уралдсан Монгол Улсын тамирчин, ОУХМ Б.Марал-Эрдэнэ аваргын алтан медаль хүртлээ.

13 тамирчин хурд хүч авхаалж самбаагаа сорин өрсөлдсөн эл ангилалд 46 дугаартай уралдсан тэрээр нийт замаа 45 минут 22 секундэд туулжээ. Түүний дундаж хурд цагт 44.43 км байсан байна. Энэ удаагийн Азийн аваргад манай улсаас 18 хүртэлх насны ангилалд дөрөв, 19-23 хүртэлх насанд мөн дөрөв, 24-өөс дээш буюу насанд хүрэгчдийн ангилалд таван тамирчин оролцож байна. Тэмцээн нөгөөдөр өндөрлөнө.