Э.УНДРАЛБАЯР

Шинэ цагийн Монголын соёл, урлагийн түүхэнд дуулалт жүжиг хэмээх төрөл бий болсноос хойш олон жил өнгөрчээ. “Ай нан аа” түүхэн дуулалт жүжиг амилснаас хойш дөрвөн жил гаруйн хугацаа өнгөрчээ. Тэгвэл эл жүжиг Улаанбаатар чуулгын тайзнаа сэргээн тавигдах гэж байна. Нийслэлийн Улаанбаатар чуулгын 10 жилийн ойд зориулан “Ай нан аа” түүхэн дуулалт жүжгийг өнөөдөр, маргааш 19:00 цагт хоёрхон удаа тоглох гэж байна.

“Ай нан аа” дуулалт жүжгийн зохиолыг “Гэгээн муза” наадмын Гран при шагналт зохиолч Б.Цогнэмэх, хөгжмийг Монголын хөгжмийн зохиолчдын холбооны ерөнхийлөгч, хөгжмийн зохиолч Х.Алтангэрэл бичиж, Монголын театр, киноны нэрт найруулагч, урлагийн гавьяат зүтгэлтэн Л.Эрдэнэбулган найруулан олны хүртээл болгох аж.

Энэхүү жүжиг нь VIII богд Жавзандамба хутагт, да лам Цэрэнчимэд, хошой чин ван Ханддорж,  сайн ноён хан Намнансүрэн нарын Монголын түүхэн дэх шашин, төрийн зүтгэлтний ухаалаг шийдвэр, холч хараа, зориг тэвчээрийн ачаар  үндэсний эрх чөлөөний хувьсгал ялж, тусгаар тогтносон тухай түүхэн үнэнийг өгүүлэх дуулалт жүжиг юм.

Эл дуулалт жүжгийн дүрүүдэд Улаанбаатар чуулгын гоцлол дуучин, гавьяат жүжигчин С.Ганзориг, Г.Хонгорзул, СТА М.Анхтуяа, Б.Батболд, Б.Эрдэнэсаруул, гоцлол дуучин Ж.Буянтогтох, О.Анхчимэг, Ч.Дорж, Ц.Гансүх, Н.Бямбадорж, Э.Очирсайхан болон Улаанбаатар чуулгын бүжигчид оролцон тоглох юм. Харин туслах найруулагчаар СТА П.Урнаа, удирдаачаар СТА Д.Нямдаш ажиллаж, “Хангарьд” үндэсний хөгжмийн найрал тоглоно.