Чарлигийн шар­гал үст халуухан сахиусан тэнгэр Дрю Бэрримор энэ өдөр 41 нас хүрч байна. Жүжигчин, зохиолч, найруулагч, продюсер, фото моделиор ажилладаг тэрээр хүүхэд ахуйдаа алдарт найруулагч Стивен Спилбергийн “E.T The Extra terrestrial” уран сайхны кинонд тоглож, ирээдүйд инээдмийн гайхалтай сайн жүжигчин болохоо харуулсан байдаг. Тэрээр 20 насандаа алдарт жүжигчин Вүүпи Голдберг, Мэри лу Паркер нартай “Boys on the side” инээдмийн драмд хамтран тоглож, үүний дараа “Хуримын дуучин”, “Анхны 50 болзоо” зэрэг романтик инээдмийн уран бүтээлд тоглосон юм.

Америкийн Үндэсний сагсан бөмбөгийн холбооны “Sacramento Kings” багийн ес дугаартай мэргэжлийн сагсан бөмбөгийн тоглогч Ражон Рондо 1986 оны энэ өдөр Кэнтуккийн Луйсвиллд мэндэлжээ. 2008 онд Америкийн үндэсний сагсан бөмбөгийн холбооны аварга шалгаруулах тэмцээн, хоёр жилийн дараа “NBA All star”-д “Boston Celtics” багаас анхлан оролцож байсан тэрээр үндэсний сагсан бөмбөгийн холбооны аварга шалгаруулах 2010 оны тэмцээнд бөмбөг таслалт, хоёр жилийн дараа мөн тэмцээнд оновчтой дамжуулалтын тоогоороо тэргүүлсэн байдаг. Өнгөрсөн улиралд тэрээр Бостон Сэлтиксээс Даллас Мавериксэд худалдагдаж, энэ улиралд Сакраменто Кингс багт тоглохоор гэрээ үзэглэсэн юм.