Английн Премьер лигийн шилдэг таван багийн удирдлагууд нийслэл Лондон хотод нууц уулзалтыг зохион байгуулж, “Европын суперлиг”-т оролцох талаар ярилцсан гэнэ. Манчестер Юнайтед, Манчестер Сити, Челси, Арсенал, Ливерпүүлийн удирдлагууд АНУ-ын тэрбумтан Стивен Росстой уулзсан нь энэ. Гурван тэрбум ам.долларын хөрөнгөтэй Росс Европын топ 20 багийг урьж, “Европын супер лиг” тэмцээн зохион байгуулахаар төлөвлөж байгаа юм.

Хэрвээ түүний хүсэл биелэх юм бол Аваргуудын Лигт нэлээд асуудал үүсэх нь тодорхой. Росс ирэх зун АНУ-д Европын шилдэг багуудыг урьж, улирлын өмнөх тэмцээнийг зохион байгуулна. Саяхан Олон улсын хөлбөмбөгийн холбооны ерөнхийлөгчөөр сонгогдоод байгаа ЕХБХ-ны ерөнхий нарийн бичгийн дарга асан Жанни Инфантино үүнээс огтхон ч айхгүй байна хэмээн өөрийн цахим хуудсандаа нийтэлжээ.