Лондонгийн метронд английн ерөнхий сайд Уинстон Черчиллийн сүнс, хий үзэгдэл байна гэж нийслэлийн нэгэн оршин суугч баталж байна. Ерөнхий сайдын сүнс, хий үзэгдэл шөнийн цагаар метроны бараг хүнгүй буудалд эргэлдэж хүмүүсийг айлгадаг гэж байнга метрогоор зорчдог 23 настай Грег Гур гэгч ярьжээ. Автобусны жолоочоор ажилладаг тэрээр өглөө оройдоо метрогоор зорчиж, өдөр бүр  л нэг буудлаас явж, тэндээ буудаг гэнэ.
Сарын өмнө тэр шөнө дунд өнөө л “Queenway” өртөөнд  галт тэрэг хүлээж байтал өөр лүү нь үл мэдэгдэх сонин дүрс, хий үзэгдэл ойртоод ирсэн байна.
Үүнээс хойш хэд хэдэн удаа таарч сайн ажиглавал давцан дээр нэг их өндөр биш, бүрх малгайтай хүний дүрс тод харагджээ.
“Би нэг их айгаагүй ч миний өмнө хэн нэгэн зогсч байгааг ойлгосон. Гэхдээ энэ бол хий үзэгдэл байлаа. Би жаахан ойртоод сайн ажигласнаа тэр үзэгдэл Уинстон Черчиллтэй тун төстэй болохыг нь мэдсэн. Тэгмэгц би гар утасаа гаргаад зургийг нь авсан. Хий үзэгдэл ч алга болж, миний зураг дээр утаа төдий л зүйл үлдсэн байсан” гэж Грег ярьжээ.

Гэртээ харьсны дараа өнөөх зургаа  найз бүсгүйдээ явуулсныг нь тэр нь интернетийн сүлжээнд оруулчихаж. Үзсэн хүмүүс ихэнх нь ямар нэгэн хүний дүрс байна гэсэн бол зарим нь юу ч алга, зүгээр л чийдэнгийн гэрэл шалан дээр тусч байна гэжээ. Нэг хэсэг нь утаа байна гэсэн байна.
Дэлхийн хоёрдугаар дайны үед буюу Уинстон Черчиллийг английн Ерөнхий сайд байх үед метроны энэ “Queenway” өртөө байсан газарт газар доорхи хоргодох байр байсан гэнэ. Ерөнхий сайд Черчилл ч энэ хоргодох байранд лавтай хоёр ч удаа ирж байсан гэдэг.
Угтаа Уинстон Черчилл энд нас бараагүй ч британийн алдарт улстөрчийн сүнс Лондон хотоор хэрэн явж, амьд ахуйдаа очиж байсан гзаруудаараа “ордог” ч юм бил үү, хэн мэдэхэв.