Монголын амьд хөгжмийн “Playtime 2016” наадам  ирэх зургадугаар сарын 24-26-нд Монгол шилтгээнд болно. Наадамд оролцох хамтлагуудын шалгаруулалт эхэлж, 40 хамтлаг бүртгүүлснээс 16 хамтлаг оролцох эрхтэй болжээ. Тус 16 хамтлагаас 12 нь наадамд оролцох эрхтэй бөгөөд шилдэг нэг хамтлаг их тайзнаа дуулна. Өнгөрсөн жил их тайзны эрхийг “The Colors” хамтлаг хүртэж байсан билээ. 2002 онд анх гарын таван хуруунд багтах дайны хамтлаг дуучид оролцож байсан эл наадамд энэ жил 50 гаруй уран бүтээлч оролцоно. Тус наадам орчин үеийн хөгжмийн соёлыг хөгжүүлэх, залуусын амралт чөлөөт цагийг цэвэр агаарт, байгаль орчинд ээлтэй хэлбэрээр өнгөрүүлэх, дэлхийн болон Монголын шинэ, шилдэг амьд хөгжмийн хамтлаг, дуучдыг танилцуулж, хөгжим сонирхогчдын хөгжмийн боловсролыг дээшлүүлэх зорилготой юм.