Дуучин, хөгжмийн зохиолч, жүжигчин Лэди Гага буюу Stefani Joanne Angelina Germanotta 1986 оны энэ өдөр Нью-Йоркт мэндэлжээ. 2008 онд анхны “The Fame” цомгоо хэвлүүлж, цомогт багтсан “Just Dance”, “Poker face” зэрэг дуунууд нь гарсан даруйдаа хитүүдийг тэргүүлсэн бол 2009 онд гаргасан “The Fame Monster”, “Bad Romance”,” Telephone”,” Alejandro” гэх мэт синглүүд нь мэргэжлийнхнээс өндөр үнэлгээ хүртсэн юм. Түүний 2011 онд гаргасан “Born this way” цомог бүхэлдээ хит болсон. Учир нь эл цомог гарсан эхний долоо хоногтоо АНУ-д нэг сая хувь борлогдож, 20 гаруй улсын шилдэг цомгийн жагсаалтыг тэргүүлжээ. 2013 онд гаргасан гурав дахь бие даасан “Artpop” цомгийн “Applause” сингл мөн л АНУ-ын чартуудыг тэргүүлэв.

Тэрээр “Америкийн аймшгийн түүх: Зочид буудал” цувралд бүтээсэн дүрээрээ “Алтан бөмбөрцөг 2016” наадмаас шагнал хүртсэн. Түүний цомог 27 сая хувь, харин сингл нь 146 сая хувь борлуулагдаж, тэрээр бүх цаг үеийн хамгийн их борлуулалттай дуучдын жагсаалтыг тэргүүлж байна.