Улсын хэмжээнд энэ сарын 1-ний байдлаар Булган аймгийн Бугат сум, Дорнод аймгийн Баянтүмэн, Баян-Уул, Матад, Сүхбаатар аймгийн Эрдэнэцагаан, Сүхбаатар, Наран, Дарьганга, Хэнтий аймгийн Биндэр сум гэхчлэн дөрвөн аймгийн есөн суманд 10 удаа, нийслэлийн Хан-Уул дүүргийн 11 дүгээр хороо, Богины аманд нэг, нийт 11 удаагийн ой, хээрийн түймэр гарч, 39.3 мянган га газар түймэрт өртөөд байна.

Түймрийн улмаас  хоёр гэр, нэг саравч шатаж, 40 толгой мал өртсөн хэмээн Онцгой байдлын ерөнхий газраас мэдээллээ. Түймрийг унтраахад Онцгой байдлын байгууллагаас 86 албан хаагч, зургаан автомашин, Хилийн цэргийн анги, байгууллагаас 79 албан хаагч, долоон автомашин, хоёр мотоцикль, 192 иргэн, 19 автомашин тус тус дайчлагдан ажилласан бөгөөд одоогоор дээрх түймрийн тохиолдлын гурвын нь бүрэн унтрааж, тавыг нь цурманд оруулаад байна. Түүнчлэн, Онцгой байдлын ерөнхий газрын гал түймэртэй тэмцэх тасгаас ой, хээрийн түймрийг хохирол багатай, шуурхай унтраах зорилгоор тухай бүрт төв, орон нутгийн Онцгой байдлын газар, хэлтсийн дарга нарт түймрийн цагийн байдал, цаашид авч хэрэгжүүлэх арга хэмжээний талаар заавар, зөвлөмж өгч, мэргэжлийн шуурхай удирдлагаар ханган ажиллаж байгаа юм.

Хаврын хуурайшилт эрчимжиж, түймрийн гаралт, давтамж нэмэгдэж байгаатай холбогдуулан иргэд, аж ахуй нэгжүүд ой, хээрийн түймрээс урьдчилан сэргийлж, анхаарал болгоомжтой байхыг Онцгой байдлын ерөнхий газраас анхааруулж байна.