Ж.ГЭРЭЛЧУЛУУН

Узбекстаны нийслэл Ташкент хотноо болсон 2016 оны жүдо бөхийн Азийн аварга шалгаруулах тэмцээнд манай 18 жүдоч зодоглож, дөрвөн алт, нэг мөнгө, таван хүрэл медаль хүртэж, багийн нийлбэр дүнгээр хоёрдугаар байрт шалгарлаа. 30 орны эрэгтэй 137, эмэгтэй 98 нийт 235 жүдоч хүч үзсэн тэмцээн өчигдөр багийн барилдаанаар өндөрлөсөн юм.

Энэ жилийн Азийн аварга шалгаруулах тэмцээн манай жүдочдын хувьд түүхэн амжилт гаргасан тэмцээн байв. Учир нь, Азийн аваргаас анх удаа арван медаль хүртсэний дөрөв нь алт байв. Түүнчлэн, багийн барилдаанд эрэгтэй, эмэгтэй баг хоёул финалдсан нь урьд үзүүлж байгаагүй том амжилт билээ. Багийн барилдаанд эрэгтэй, эмэгтэй хоёр баг маань мөнгөн медалийн эзэн болсон юм.

Олимпын алт, мөнгөн медальт, Хөдөлмөрийн баатар, Гавьяат тамирчин Н.Түвшинбаяр жиндээ аваргалж, анх удаа Азийн аваргаболов. Мөн тэмцээний 66 кг-д зодоглосон ОУХМ Д.Алтансүх алтан медаль хүртсэн.

Тивийн тэмцээнээс 14 медаль хүртэж байсан тэрээр Азийн аваргад анх удаа зодоглосон нь энэ. Түүнчлэн, 81 кг-д ОУХМ Н.Дагвасүрэн ААШТ-д анх удаа зодоглож алтан медаль хүртсэн бол эмэгтэйчүүдийн  57 кг-д зодоглосон Д.Сумъяа мөн өөрийн жинд аваргаллаа. Тэрээр 2012-2014 онд Азийн аваргаас дараалан хүрэл медаль хүртэж байсан бөгөөд энэ жил медалийн өнгөө хувиргаж алт болгосон юм.

Эмэгтэйчүүдийн 48 кг-ын жингийн аваргын төлөө Дэлхийн аварга М.Уранцэцэг, Казахстаны нэрийн өмнөөс барилдаж буй Г.Отгонцэцэг нар барилдаж, Г.Отгонцэцэг аваргалж, М.Уранцэцэг мөнгөн медаль хүртсэн. Харин эрэгтэйчүүдийн 60 кг-д барилдсан ОУХМ Ц.Цогтбаатар, эмэгтэйчүүдийн 52 кг-д зодоглосон М.Бундмаа, 63 кг-д ОУХМ Ц.Цэрэннадмид,+78 кг-д О.Жавзмаа, -78 кг-ын жинд зодоглосон П.Лхамдэгд, нар хүрэл медаль хүртсэн амжилтаар тэмцээнээ өндөрлүүллээ.