Монголын үсчин гоо сайханчдын шинэ үеийнхний амжилт, ур чадвар ямар түвшинд явааг харуулах зорилготой “Алтан хайч” улсын уралдаан маргааш “Аса” циркт болно. Энэ удаагийн уралдаанд үсчин, гоо засалчийн мэргэжлээр суралцдаг 144 оюутан өрсөлдөхөөр мэдүүлгээ өгчээ. Жил ирэх тусам хүрээгээ тэлэн чансаажиж байгаа эл тэмцээн нь үсчин гоо засалчдын ур чадвар, бүтээлч сэтгэлгээг хөгжүүлэх зорилготой юм.

Түүгээр ч барахгүй багшлах мэргэжилтний ур чадварыг дээшлүүлэх үйлсэд ихээхэн хувь нэмэр оруулдаг гэж үздэг.  “Алтан хайч” уралдааны оролцогчид тухайн оны үсний засалт, нүүр будалтын чиг хандлагыг тодорхойлох даалгавартай байдаг. Тиймээс  энэ жил ямар засалт трэнд болохыг маргаашийн тэмцээнээс мэдэж болох нь. Дашрамд сонирхуулахад, Ражив Гандийн нэрэмжит Үйлдвэрлэл урлалын политехникийн коллежийн 50 жилийн ойн хүрээнд уг тэмцээн зохион байгуулагдаж буй гэдгээрээ онцлогтой юм.