Э.ГАНЦЭЦЭГ

“Би чамайг хайрлан, харамлаж
Бие сэтгэлээ чамдаа зориулж
Гэнэн залуу насаа намрын навчис шиг гээчихээд
Гэгээн хүслэнд цаламдуулж явна даа” хэмээн “Хайрын бурхан” дуугаараа сонсогчдынхоо сэтгэл зүрхийг уяраан, догдлуулж байсан дуучин бол Б.Сарантуяа. 1990-ээд оны дунд үед залуучууд нэг хэсэгтээ л “Хайрын бурхан”-дсан. Эл дууг хөгжмийн зохиолч, гитарчин Д.Өлзий-Орших зохиож, дуучин Сараа unplugged хэлбэрээр дуулж, дүрсжүүлсэн нь үзэгч, сонсогчдын сэтгэлд хоногшин үлдсэн.
Тэгвэл “Хайрын бурхан” дууны үргэлжлэлийг уран бүтээлчид маань үзэгч, сонсогчдодоо 20 жилийн дараа өргөн барилаа.
“Хайрын бурхан 2” дууны үгийг Монгол Улсын Соёлын гавьяат зүтгэлтэн Ү.Хүрэлбаатар тэрлэсэн бол аяыг хөгжмийн зохиолч, гитарчин Д.Өлзий-Орших хийжээ. “Хайрын бурхан 2” дууны клип “Хайрын бурхан” дууны клипийг санагдуулам аж. Өөжгий гитар тоглож, Сараа харин намирсан хүрэн хөшигний өмнө дуулна...Түүнчлэн unplugged хэлбэрээр дуулсан нь “Хайрын бурхан” дууг эрхгүй санагдуулна. Ийнхүү Монголын рок поп урлагт 30 жил зүтгэж буй поп хатагтай Сараа үзэгч, сонсогчдыг “Хайрын бурхан”-аараа ахин байлдан дагуулах бололтой.