“Хүлэгү пикчрс” кино компани, “Монгол кино нэгтгэл”-тэй хамтран “Эдүгээчилсэн Монгол кино” төслийг хэрэгжүүлэхээр болж хуучны кинонуудыг шинэчлэн найруулахаар болсон. Энэ ажлынхаа эхлэл болгож “Өнөр бүл” киног шинэчилсэн хувилбараа энэ ням гарагт дэлгэцнээ гаргахаар болсноо өчигдөр дуулгав.

 Анх 1980 онд Д.Дожоодоржийн зохиол, Д.Жигжидийн найруулгаар та бидэнд хүрч байсан киноны шинэ хувилбарын зохиолыг Т.Номуунзул бичиж, С.Баттулга найруулсан байна. Шинэчилсэн уран бүтээлийнхээ талаар найруулагч С.Баттулга ярихдаа “Жигжид гуайг давж гарах гэж, эн зэрэгцэх гэж энэ киног найруулаагүй юм шүү. Зөвхөн сэргээх гэж л оролдлоо” хэмээсэн. Харин Монгол Улсын гавьяат жүжигчин Ч.Алтан-Өлзийгийн дүрд тоглож буй Д.Баттөмөр “2050 онд энэхүү шинэчилсэн хувилбарыг залуу үеийнхэн маань дахин шинэчлэхийг үгүйсгэх аргагүй юм. Миний хувьд энэ кино маш урт хугацааг туулаасай гэж хүсч байна. Энэ сайхан кинонд хамтран ажилласандаа баяртай байна” гэв.