Мэргэжлийн боксын хүнд жингийн аварга, домогт боксчин Мухаммад Али АНУ-ын Аризона муж улсын эмнэлэгт өнгөрсөн баасан гарагт 74 насандаа таалал төгсчээ. Тэрбээр амьсгалын замын өвчний улмаас эмнэлэгт хэвтэн эмчлүүлж байсан билээ.

Али 1960 оны Ромын Зуны Олимпын наадмаас хагас хөнгөн жингийн төрлөөр алтан медаль хүртэж байсан юм.

Мэргэжлийн бокст орсныхоо дараа Али 1964 онд Сонни Листонг ялснаар 22 настайдаа дэлхийн боксын хүнд жингийн аварга болж байсан билээ. Гэвч үүнээс гурван жилийн дараа тэрбээр Вьетнамын дайнд оролцохоос татгалзсанаар бүс болон бокс тоглох тусгай зөвшөөрлөө хураалгаж байв.

Домогт боксчин 1974 онд мэргэжлийн бокст эргэн ирснээр дахин дэлхийн аварга болж байжээ. Тэрбээр 61 удаа боксын дэвжээнд гарахдаа 56 удаа ялж байв. Үүний 37 удаад нь нокаут буюу нам цохилтоор ялж байсан байна.

Али арьсны өнгөөр ялгаварлан гадуурхах үзлийн эсрэг бат зогсдог байсан юм. АНУ-ын нэгэн ресторанд арьсны өнгөөр ялгаварлан гадуурхсаныг тэрбээр эсэргүүцэн Олимпын алтан медалиа гол руу шидэж байсан удаатай.

АНУ дахь африк гаралтай америкчуудын эрхийг хамгаалахыг шаардсан жагсаал цуглаануудад тэрбээр оролцож, арьсны өнгөөр ялгаварлан гадуурхах үзэлд цэг тавихыг дэлхий дахинд уриалж байсан юм.

Алиг 1981 онд мэргэжлийн боксоос зодог тайлсных нь дараа Паркинсоны өвчтэй гэж оношилжээ. Гэсэн ч тэрбээр 1996 оны Атлантагийн Зуны Олимпын бамбарыг асааж байсан билээ.

Өвчин  түүнийг сайн дурын үйл ажиллагаанд оролцохыг нь зогсоож чадаагүй юм. Тэрбээр цэргүүд болон эмэгтэйчүүдийг дэмжин АНУ-ын армийн баазуудад очдог байжээ.

2005 онд АНУ-ын Засгийн газар түүнийг Эрх чөлөөний одонгоор шагнажээ. Энэ нь тус улсын хамгийн том шагнал аж.