Монголын залуучуудын холбоо “Хулгайчгүй Монгол” хөдөлгөөн өрнүүлж, улстөрчдийн хар, цагаан жагсаалтыг олон нийтийн саналд тулгуурлан гаргасан гэж байсан билээ. Хар жагсаалтад орсон хүмүүсийг сонгохгүй байхыг иргэдэд уриалж байсан нь саяхан.

Гэвч тэдний хар жагсаалтад олон гэм зэмгүй хүн өртжээ. Тэдний нэг нь Монгол Улсын Боловсролын их сургуулийн захирал Д.Мөнхжаргал. Түүнийг “Хар жагсаалт-сонгууль 2016”-д оруулж, ор үндэслэлгүй нэр дэвшигч мэтээр зарлан ташаа мэдээлж нэр төрд нь халдсан байсан юм.

Үүнийх нь хариуд МУБИС-ийн захирал, проф. Д.Мөнхжаргал холбогдох байгууллагад нь хүргүүлсэн шаардлагадаа “Миний нэр, зурагтай ор үндэслэлгүй мэдээлэл оруулж нэр төрд маань халдлаа. Миний бие ямар нэгэн улс төрийн үйл ажиллагаа явуулдаггүй, сургууль боловсролын байгууллагад ажилладаг. Тиймээс энэхүү үндэслэлгүй мэдээлэлдээ албан ёсоор залруулга гарган даруй уучлалт гуйхыг шаардаж байна. Хэрэв миний нэр төр, ажил хэргийн нэр хүндэд халдан гутаасан энэ үйлдэлдээ уучлалт хүсч залруулга гаргахгүй бол шүүхэд хандан шийдвэрлүүлэх болно” гэжээ. Харин үүнийх нь хариуд Монголын залуучуудын холбооны ерөнхийлөгч А.Мөнбат “Нэр дэвшээгүй таныг жагсаалтад оруулсан нь манай талын хариуцлагагүй үйлдэл тул танаас уучлалт хүсье” гэжээ.

Ямартай ч тус сургуулийн зүгээс МЗХ-нд хандаж ор үндэсгүй, үнэн бодит бус, хүний нэр хүндэд халдсан аливаа ёс зүйгүй үйлдэл гаргахгүй байхыг анхааруулсан байна.