Өмнөд Солонгосын “Samsung” компани нь “Galaxy Note 7” худалдан авсан хүмүүсийг утсаа  яаралтай унтраагаад шинэ аюулгүй хувилбараар үнэ төлбөргүй солиулж авахыг зөвлөжээ. “Samsung” компани албан ёсны сайт дээрээ “Манай үйлчлүүлэгчдийн аюулгүй байдал бидний нэн тэргүүнд анхаарах зорилт. Бид “Galaxy Note 7” смартфонуудыг унтраан, аль болох ойрын хугацаанд шинээр сольж авахыг зөвлөж байна” гэж бичжээ.
“Galaxy Note 7” утасны зай нь хараахан тодорхойгүй шалтгааны улмаас дэлбэрч шатсан тохиолдол олноор гарах болсон бөгөөд одоогоор 35 удаагийн тохиолдол албан ёсоор бүртгэгджээ. Албан бус мэдээгээр утсыг дууриамал цэнэглэгчээр цэнэглэх явцад утас дэлбэрдэг аж.