Б.СОНОР

Загвар өмсөгч, мисс Н.Ану “MISS TOURISM QUEEN INTERNATIONAL” тэмцээнд оролцохоор явлаа.
Тус тэмцээн нь нэг үндсэн ялагчаас гадна таван тивийн төлөөлөл болгож таван бүсгүйг тивийн хатан хаанаар шалгаруулдаг.  2007 онд манай улсаас анх удаа загвар өмсөгч, мисс Г.Оюунгэрэл тус тэмцээнд оролцож Ази тивийг төлөөлсөн шагналт байр шалгарч “Азийн хатан хаан” хэмээх өргөмжлөл хүртсэн билээ. Энэхүү амжилтыг ахиулах зорилт тавин, найдвар өвөртөлж өнөө жил тус тэмцээнийг зорьж буй мисс Н.Ану нь Азийн супер модель бөгөөд эх орноо төлөөлж Дэлхийн миссийн тэмцээнд оролцож байсан туршлагатай нэгэн гэдгийг уншигчид маань андахгүй.
Тус тэмцээн нь өнөө жил Хятадын Аялал жуулчлалын шинэлэг бүс болгон хөгжүүлж буй Пинь Янь хотод энэ сарын 12-29 хүртэл үргэлжлэх гэнэ. Мөн манай улсаас тэмцээний зохион байгуулагчдын урилгаар Азийн топ фэйшн фото зурагчин шагналт Ж.Батсайхан оролцогчдын зураг авалтын ажилд оролцохоор явжээ.