Олон улсын гимнастикийн холбоо 1881 онд байгуулагдсан бөгөөд 135 дахь жилтэйгээ золгож байна. Тус холбооны 81 дэх удаагийн “КОНГРЕСС” Япон улсын нийслэл Токио хотноо энэ сарын 17-нд эхэлжээ. Өнөөдөр өндөрлөх тус хуралд Монголын гимнастикийн холбооны ерөнхийлөгч Б.Лхагважав, ерөнхий нарийн бичгийн дарга Г.Ерөөлбат нар оролцож буй юм байна. Монголын гимнастикийн холбоо 1961 онд байгуулагдсан бөгөөд олон улсын холбоонд 1962 онд албан ёсны гишүүнээр элсчээ. Энэ удаагийн хурлаар холбооныхоо ерөнхийлөгчийг сонгосон байна. Тус холбооны дэд ерөнхийлөгчид өрсөлдсөн ОХУ-ын Василий Титов 68 хувийн саналаар ялалт байгуулсан бол ерөнхийлөгчид 100 хувийн саналаар Японы гимнастикийн холбооны Ерөнхий нарийн бичгийн дарга, ОУГХ-ны Гүйцэтгэх зөвлөлийн гишүүн Ватанабэ Моринари сонгогджээ.

Энэхүү хурлын үеэр мөн гимнастикийн хэрэглэл, хэрэгсэл, тоног төхөөрөмжийн фирмийн үзэсгэлэн гарсан бөгөөд “ТОКИО-1964” олимпод хэрэглэсэн Бариулт морийг тавьсан нь олон хүний анхаарлыг татаж чаджээ. Мөн япончууд шүүлтийн цоо шинэ электрон систем туршиж байгаагаа сонирхуулжээ.