Б.СОНОР

Загвар өмсөгч С.Сарнай Малайзын Куала Лумпур хотноо болсон “Miss Nobel and Mrs Nobel Queen” тэмцээний ялагч боллоо. Тэрээр энэ тухайгаа өөрийн цахим хуудаснаа нийтэлсэн бөгөөд өөрийг нь дэмжин санал өгсөн дэмжигчдэдээ талархал илэрхийлсэн байна. Учир нь тэрээр мөн тэмцээний үеэр дэмжигчдийн хандалтаар шалгаруулсан “Miss popular” шагналын эзэн болжээ.
Тус тэмцээний тэргүүн титмийг дагалдаж 10 мянган малай ренгэт буюу 2400 орчим ам.долларын урамшуулал иржээ. Гэхдээ мөнгөн шагнал хамгийн гол зүйл биш. С.Сарнай тус тэмцээнд оролцохоор Малайзад очсон даруйдаа “Хэрвээ энэ удаагийн тэмцээнд тэргүүн байрт шалгарах юм бол Холливуд руу бас нэгэн том тэмцээнд оролцохоор явна шүү” хэмээн өөрийн фэйсбүүк хуудсандаа бичиж байсан билээ. Тэгвэл тэрээр зорилгоо биелүүлж чадлаа. Тэрээр ирэх арванхоёрдугаар сард ахин АНУ-ын Холливудад зохиогдох сайхан бүсгүй шалгаруулах тэмцээнд оролцохоор зэхэж байна.