Эдүгээ 14 дэх жилдээ үзэгчдэд хүрэх гэж байгаа “Virtuoso Gala Concert” ирэх сарын 28-нд УДБЭТ-т болох нь. Тоглолтын талаар зохион байгуулагч, “Virtuoso” академийн гүйцэтгэх захирал Р.Оюунжаргал фэйсбүүк хуудаснаа ийн бичжээ. “Цаг хугацаа харвасан сумнаас ч хурдан нисэн өнгөрөх мэт. Тэртээ 2000 онд шилдэг хөгжимчид, дуучид, бүжигчдийн нэгдсэн концертод хэн хэнийг тоглуулах вэ, энэ жил амжилт гаргасан ямар уран бүтээлч байна, ер нь хэн мэргэжлийн өндөр түвшинд тоглож байна вэ гэж нэрсийн жагсаалт гаргачихаад, зарим нэгийг нь хасч, заримыг нэмж суусан өдрүүд саяхан санагдах юм.
Гэтэл одоо 14 дэх удаагийн тоглолтын тов зарлачихаад уран бүтээлчидтэйгээ өдөр шөнөгүй холбогдон ярилцаж, санаа оноо, мэдээлэл солилцож бас л цаас нухаж, компьютер ширтэж сууна. Энэ үеийн анхаарал төвлөрөл, сэтгэл хөдлөл, хариуцлага, баяр жаргал, стресс бүгд давхцах мэдрэмж бас л сонин. Мэдээж баяр жаргал нь илүү. Яагаад гэвэл бид уран бүтээлчдэд, үзэгчдэд, өөрсдөдөө ч зориулж амьдралын хамгийн гоё агшин, алдаж болохгүй нэгэн үдшийг бэлтгэж, зохион байгуулдаг. Уран бүтээлчид дор бүрээ бэлтгэлээ базааж байна. Мэргэжлийн шилдэг хөгжимчид Virtuoso Gala Concert-ын тайзнаа тун удахгүй. Зөвхөн энэ үзүүлэлт тоглолт үзэх, хөгжим сонсох шалтгаан байдаг” хэмээжээ.