Шинэ үеийн утга зохиолыг үндэслэгч, соён гэгээрүүлэгч, төр нийгмийн нэрт зүтгэлтэн, их зохиолч Д.Нацагдоржийн мэндэлсний 110 жилийн ойд зориулсан “Монгол ардын суут” баримтат драмын жүжиг өнөөдөр 19:37 цагт Улсын Хүүхэлдэйн театрын тайзнаа нээлтээ хийнэ.
СГЗ, “Болор цом”-ын эзэн, яруу найрагч Ц.Хулангийн зохиолоор бүтээж буй энэхүү жүжгийн найруулагчаар УГЗ Б.Баатар, хөгжмийн зохиолчоор УГЗ Т.Сэр-Од ажиллажээ. Яруу найрагч Ц.Хулан "Аугаа их суут билэгтэн, төрөлх хэлнийхээ жинхэнэ эзэн болсон авьяас билэгт Дашдоржийн Нацагдорж хэмээх энэ эрхэм хүн 110 жилийн өмнө Монгол Улсад морилон саатаад буцсан байх юм. Эдгээр өдрүүдэд соёл урлагийн байгууллагууд өөрсдийн уран бүтээлээ энэ агуу түүхт хүнд зориулж байна. Өнөөдөр ч түүний бүтээлүүд амьд байна. Түүний сүүлийн шөнийн тухай өгүүлсэн жүжиг үзэгчдэд хүрэхэд бэлэн боллоо” гэсэн юм.
Жүжгийн гол дүр Ц.Нацагдоржид Ц.Цэрэндорж, Д.Пагмадуламд М.Энхзаяа, Хар хүнд Г.Гандөш, Халамцуу бүсгүйд Я.Өнөртуул нар тоглоно.
Энэхүү жүжгийн тасалбарыг Улсын Хүүхэлдэйн театрын кассаар худалдаж байна.
