Поп опера урсгалаар уран бүтээлээ туурвидаг “Нюанс” 15 жилийн ойн тоглолтоо энэ сарын сүүлээр үзэгчдэд толилуулахаар бэлгэлээ базааж байна.

Тус хамтлаг 2001 оноос уран бүтээлийн гараагаа эхэлснээс хойш Монголын үзэгчдэд уран бүтээлээ хүргэн, олон улсын наадамд амжилттай оролцсоноос гадна попера урсгалыг сурталчлах үйлсэд хувь нэмрээ оруулж байгаа юм. Мөн урын сан, уран бүтээлдээ дэлхийн сонгодог, алдартай поп болон попера дууг Франц, Итали, Испани, Орос, Англи, Хятад, Герман хэлээр дуулдгаараа бусад хамтлаг дуучдаас онцлогтой.

Тэд өнгөрсөн 15 жилийн хугацаанд урын сандаа эх хэл болон гадаад хэлээр дуулсан 200 гаруй дуу, 20 гаруй видео клиптэй болжээ. Иймээс ойн хүндэтгэлийн тоглолтдоо шилдэг, хит дуунуудаа дуулж фэнүүддээ бэлэг барих юм.

“Нюанс хамтлаг нь Монголын үзэгчдэд поп хөгжим болон сонгодог дууны бүтээлийг попера урсгалаар дамжуулан дуурийг ойлгодогүй, дуурь тэдний сонирхол биш гэдэгт бат итгэлтэй хүмүүст дуурь үзэх сонирхогчдын хүрээг тэлж өгсөн” гэж урлаг судлаачид үздэг байна.