“Рио-2016” олимпын чөлөөт бөхийн эрэгтэйчүүдийн 65 кг-д ДАШТ-ий хошой хүрэл медальт, гавьяат тамирчин Г.Мандахнаран хүрэл медалийн төлөө Узбекстаны бөх Наврузовт эцсийн мөчид тун эргэлзээтэй ялагдаж, V байрт шалгарсан. Бөхийн спорт сонирхогчид төдийгүй бөхийн хүрээнийхэн эл барилдаанд шүүлтийн булхайгаас болж гавьяат маань хүрэл медалиа луйвардуулсан хэмээн үзэж буй. Өдгөө 30 настай Г.Мандахнаран гавьяатыг зодог тайлах вий хэмээн зарим спорт сонирхогч сэтгэл зовниж, эргэлзэж байсан удаа бий. Тэгвэл гавьяат маань Токиогийн олимпод зодоглохын төлөө үргэлжүүлэн барилдахаар шийджээ. Энэ талаараа тэрээр өөрийн цахим хаягтаа,
“Ард түмнийхээ хүсэлтээр 4 жил зүтгэнэ
Ачит аавынхаа нэрээр 4 жил зодоглoно
Алдрай үрсийнхээ төлөө 4 жил хөдөлмөрлөнө
Агуу Монголынхоо төлөө 4 жил энэ биеийг дахин зориулна аа.
Алдаа бүхэн ард хоцорч Монгол ялна” хэмээн нийтэлжээ.