Америкийн кино урлагийн академиас 2017 оны “Оскар” гардуулах ёслолыг ирэх хоёр­дугаар сарын 26-нд зохион байгуулахаар товлосон билээ. Өчигдөр “Оскар”–ын 24 төрөлд тунагсдыг албан ёсоор зарлалаа. Америкийн кино найруулагч Дэмиэн Шазеллын бүтээл “Ла-Ла Лэнд” (La La Land) нийт 14 номинацид нэр дэвшсэн нь “ Эвагийн ту­хай бүх зүйл”, “Титаник” зэ­рэг киноны амжилттай эн зэрэгцээд байна. Мөн “Сарны гэрэл” кино найман номинацид өрсөлдөхөөр болжээ.

“Оскар-2017”-д Африк гаралтай долоон жүжигчин нэр дэвшиж байгаа нь кино урлагийн түүхэнд хамгийн олон хар арьст жүжигчин Оскарын өрсөлдөөнд орж ирсэн үзүүлэлт болов. Өнгөрсөн хоёр жилд Оскарт ихэвчлэн цагаан арьст жүжигчид нэр дэвшиж, “Алтан хүн”-ий эзэн болсон нь багагүй шүүмжлэл хүртээд байсан юм. Тиймээс энэ жил африк гаралтай жүжигчдэд олноор өрсөлдөх орон зайг олгосон ч байж болох.
Оросын найруулагч Андрей Кончаловскийн  “Диваа­жин” кино олон улсын томоохон наадмуудад дээгүүр амжилт үзүүлж байсан нь “Оскар”-ын гадаад хэл дээрх кино номинацид тэргүүлэх таамаглалд ороод байсан ч тунасан таван киноны нэгээр шалгарч чадсангүй. Холливудад «Миний газар нутаг» (Дани), « Худалдаачин » (Иран), «Тони Эрдманн» (Герман), «Танна» (Австрали) и «Увагийн хоёр дахь амьдрал» (Швед) эдгээр бүтээл гадаадаас өрсөлдөх нь.
Шилдэг баримтат кино төрөлд Монгол Улсын Баян-Өлгий аймгийн  харьяат Н.Айшолпан охины тухай өгүүлсэн “Бүргэдчин охин” /The Eagle Huntress/  кино эхний шатны шалгаруулалтаар 140 гаруй киноноос шилдэг 15-д тунасан орж ирсэн ч Оскарт нэр дэвшигчдийг зарлахад шилдэг тавд багтсангүй.
Хамгийн олон удаа Оскарын тайзнаа зарлагдсан жүжигчнээр алдарт Мэрил Стрип тодроод байна. Холливудын алдарт жүжигчин Мэрил Стрипийн хувьд энэ удаад 20 дахь “Оскар”-таа нэр дэвшиж, түүхэн амжилтын эзэн боллоо.  Гурван ч “Оскар”-ын эзэн Мэрил энэ удаад дуурийн дуучин бүсгүйн түүхийг өгүүлсэн «Флоренс Фостер Дженкинс» киногоороо нэр дэвшиж байгаа билээ.

“Оскар”-ын  төлөө


“Шилдэг кино” номина­цид “Ла-Ла Лэнд”, “Сарны гэрэл” (Moonlight), “Ирэгсэд” (Arrival), “Хашаа” (Fences), “Ямар ч үнээр хамаагүй” (Hell or High Water), “Ухамсрын үүднээс” (Hacksaw Ridge), “Нууц­лагдмал бодгаль” (Hidden Figures), “Арслан” (Lion), “Тэнгис дэх Манчестер” (Manchester by the Sea)

“Шилдэг эрэгтэй жүжиг­чин” номинацид Кейси Аффлек (Manchester by the Sea), Дензел Вашингтон (Fences),  Райан Гослинг (La La Land), Вигго Мортенсен (Fantastic Captain), Эндрю Гарфилд (Hacksaw Ridge)

“Шилдэг эмэгтэй жүжиг­чин” номинацид Мэрил Стрип (Florence Foster Jenkins), Изабель Юппер (Elle), Рут Негга (Loving), Эмма Стоун (La La Land), Натали Портман (Jackie)

“Шилдэг хүүхэлдэйн кино” номи­нацид  Zootop, Kubo and the Two Strings, Moana, My Life as a Zucchini, Sing, The Red Turtle

“Туслах дүрийн шилдэг эмэгтэй жүжигчин” номина­цид Николь Кидман (Lion),Виола Дэвис(Fences) , Наоми Гаррис (Moonlight), Октавия Спенсер (Hidden Figures), Мишель Уильямс (Manchester by the Sea)

“Туслах дүрийн шилдэг эрэгтэй жүжигчин” номинацид Жефф Бриджес (Hell or High Water), Махер­шала Али (Moonlight), Дев Пател (Lion), Лукас Хеджес (Manchester by the Sea), Майкл Шэннон (Nocturnal Animals) гэх зэргээр 24 номинациар өрсөлдөж байгаа юм.