Өнгөрсөн сард Монголын үндэсний олимпын хороо долдугаар чуулганаа хийж, өнгөрсөн жилүүдэд ажилласан удирдлагын багийн тайланг сонсч, ирэх дөрвөн жилд тус байгууллагыг удирдах удирдлагын багийг сонгосон байгаа. 2017-2021 он хүртэл ерөнхийлөгчөөр ажиллахаар болж улиран сонгогдсон Д.Загдсүрэн МҮОХ-ны дүрмийн дагуу хамгийн анхны гүйцэтгэх зөвлөлийн хурлаараа МҮОХ-ны ерөнхий нарийн бичгийн даргад Монгол Улсын Хөдөлмөрийн баатар, олимпын аварга Э.Бадар-Ууганыг санал болгож томилсон. Ажлаа хүлээж авсан даруйдаа Э.Бадар-Ууган спорт холбоодын Ерөнхий нарийн бичгийн дарга нарыг хүлээн авч уулзаж, холбооны үйл ажиллагаа, хөгжил болон тулгамдаж буй асуудлуудаар нь санал солилцсон юм. Тэгвэл маргааш МҮОХ-ны гишүүн спортын холбоодын ерөнхий нарийн бичгийн дарга нар дахин хорооны байранд цуглаж семинарт суухаар болжээ. Учир нь, тэдэнд зориулж ТББ-ын бүртгэл, допингийн хяналт, Олимпын эв санааны нэгдлийн сангийн хөтөлбөр болон Ашгабат-2017 Азийн танхимын болон тулааны 5 дугаар наадмын талаарх мэдээллийг хүргэж номын дуу сонсгохоор болсон байна.