Энэ сарын 28-30-нд Улаанбаатар хотод болох “Mongolia open-2017” чөлөөт бөхийн олон улсын тэмцээнд оролцохоор БНСУ-ын баг тамирчид хамгийн түрүүнд мэдүүлгээ ирүүлээд байна. Өмнөд Солонгосоос эрэгтэйчүүдийн 57 кг-ын жинд Хам Чеол-Гьюн, Ян Кьюн-Йоп, 61 кг-д Чой Жэ-Мин, 70 кг-д Хан Дэ-Жил, 74 кг-д Жеон Си-Хван, эмэгтэйчүүдийн 48 кг-д Сон Сэ-Рёон, 58 кг-д Чой Йон-Ву, 60 кг-д Хон Хан-Рэ, Ли Жи-Сёон, 63 кг-д Хё Жёон-Ин гэсэн 19-24 насны залуучууд Улаанбаатарын дэвжээнд зодоглох нь.

 Эднээс хамгийн туршлагатай бөх нь 2007 оны залуучуудын ДАШТ-ий хүрэл медальт Хон Хан Рэ юм. Гуулин улсын багийн ахлагчаар Ли Сеун Нам, ахлах дасгалжуулагчаар На Сун-Ин, эрэгтэйчүүдийн дасгалжуулагчаар Шин Хьюк-Хо, эмэгтэйчүүдийн дасгалжуулагчаар Юү Бэ-Хи, эмчээр Пак Юү-Кво, хэвлэлийн ажилтнаар Кан Сук-Хун нар ажиллахаар болсон байна.

Дэлхийн бѳхийн холбооны шинэчилсэн дүрмээр зохион байгуулах энэ тэмцээний бэлтгэл болгож  Монгол чөлөөт бөхийн холбооны шүүгчдийн зөвлөлөөс спорт хороо, клубүүд, бүх байгууллагын дасгалжуулагчдад шинэчилсэн дүрмийн сургалтыг маргааш Үндэсний биеийн тамирын дээр сургуулийн байранд зохион байгуулахаар болсон байна.