Монгол Улсад найрал дуу үүсч хөгжсөний 70 жилийн ойд зориулан "Монголын найрал дууны уран бүтээлчдийн холбоо"-ноос "Улаанбаатарын Хавар 2017" олон улсын найрал дууны анхдугаар их наадмыг зохион байгуулахаар болсон. Өнөөдөр нээлтээ хийх наадам хоёр хоног Улаанбаатар хотноо болно. Энэхүү наадамд манай улсаас ДБЭТ, ЦДБЭЧ, ХЦДБЧ, СУИС, МУБИС, СИТИ, ХБК зэрэг мэргэжлийн урлагийн байгууллагыхан оролцох бол ОХУ-ын Буриад Улсын П.И.Чайковскийн нэрэмжит урлагийн коллежийн оюутны найрал дуу, БНХАУ-ын ӨМӨЗО-ы Алша аймгийн Зүүн хошууны Улаан мөчрийн цөөхүүл дуучид, Хөлөнбуйр аймгийн Шинэ Барга зүүн хошууны Барга хүүхдийн найрал дууны бүлгэм, БНСУ-ын "Тэнгэрийн дуу" найрал дууны хамтлаг зэрэг гадаад дотоодын нийт 24 хамтлагийн 1000 гаруй уран бүтээлч оролцоно.
Наадамд оролцох уран бүтээлчид одоо Д.Сүхбаатарын талбайд зохион байгуулагдах нэгдсэн парадад оролцохоос гадна Монгол Улсын төрийн дууллыг хамтдаа дуулах юм байна.
Энэхүү арга хэмжээ өнөөдөр Хүүхдийн найрал дууны тоглолтоор үргэлжлэх бол маргааш Улсын Филармонийн концертын танхимд Гадаад хамтлагуудын нэгдсэн тоглолт, нөгөөдөр  УДБЭТ-ын тайзнаа "Улаанбаатарын Хавар 2017" олон улсын найрал дууны анхдугаар их наадмын ГАЛА тоглолтоор үргэлжилж өндөрлөх юм байна.