УДБЭТ энэ сарын 27-ноос эхэлж 54 дэх улирлынхаа шинэ уран бүтээлийг үзэгчдэдээ хүргэх гэж байна. Тодруулбал, Ф.Херольдын "La Fille mal gardee" /Муу хамгаалагдсан охин/ буюу "Дэггүй Лиз" балет үзэгчдийн хүртээл болж тус театрын урын санд нэмэгдэхээр болжээ.

Зохиолын үйл явдал нь тариачин хатагтай Симона үзэсгэлэнт ганц охин Лизтэйгээ амьдардаг бөгөөд охиноо хөрөнгө чинээтэй айлын ганц хүүтэй суулгахаар тохирдог аж. Лиз охин өөртэй нь суулгахаар болсон Аленд дургүй бөгөөд сэтгэлт залуу Колентайгаа гэр бүл болохыг мөрөөднө. Симона хатагтай ганц охиноо бусдаас харамлан сүй тавих өдөр хүртэл гэрээсээ гарч орохыг нь цагдаж байгаагаар бүжгэн жүжиг цааш өрнөдөг байна.

Энэ уран бүтээлийн удирдаачаар Урлагийн гавьяат зүтгэлтэн Ц.Мөнхболд ажиллаж байгаа бол Ц.Чинзориг дэглэн найруулж, ерөнхий зураачаар нь Урлагийн гавьяат зүтгэлтэн Г.Ганбаатар ажиллаж байгаа юм байна. Харин гол дүрд Б.Саруул, О.Анужин, А.Эрдэнэболд, Монгол Улсын гавьяат жүжигчин Х.Мөнгөнхөлөг, СТА Э.Эрдэнэжаргал, М.Нямтайван, Т.Хан-Очир, Х.Чойжилсүрэн нар тогложээ.

Хайр сэтгэл, нандин харьцааны талаарх өгүүлэх сонгодог балет нь бүх насныханд тэр дундаа хүүхдийн тань урлагийн боловсрол, хүмүүжилд эерэгээр нөлөөлөх тул гэр бүлийнхээ хамт хүрэлцэн ирж нээлтийн хөшгийг хамтдаа татахыг тус театрын хамт олон урьж байна билээ.