Монгол Улсаас АНУ-д суугаа Элчин сайдын яам Дэлхийн банктай хамтраад АНУ-Монголын хооронд дипломат харилцаа тогтоосны 30 жилийн ойд зориулан энэ сарын 16-17-ны өдрүүдэд “Монголын өвийн өдрүүд” арга хэмжээ зохион байгууллаа.
Вашингтон дахь Дэлхийн банкны албан байранд болсон эл арга хэмжээнд АНУ-ын Төрийн департамент, АНУ-ын Батлан хамгаалах яам, Дэлхийн банк, Олон улсын валютын сангийн төлөөлөгчид, АНУ-д амьдардаг монголчууд, монголын соёлыг сонирхдог гадаадын иргэд оролцсон байна.

Арга хэмжээг нээж Монгол Улсаас  АНУ-д суугаа Элчин сайд Б.Алтангэрэл, Дэлхийн банкны гүйцэтгэх захирал Жейсон Аллборд нар үг хэлсэн байна.
Арга хэмжээний үеэр монгол үндэсний дуу бүжгийн чуулгынхан дуулж бүжиж, үндэсний хөгжим эгшиглэн монгол үндэсний хоол дэлгэсэн байна. Зураач Д.Цолмон мөн “Нүүдэлчийн сэтгэлгээ” үзэсгэлэнгээ дэлгэжээ.

Монгол Улс 1991 онд Дэлхийн банкны 155 дахь гишүүн орон болсноос хойш 140 гаруй төсөл хөтөлбөр хамтран хэрэгжүүлсэн юм.