Монголын чөлөөт бөхийн эрэгтэй таван тамирчин ОХУ-ын Саха улсад хамтарсан бэлтгэл хийж байгаа бөгөөд тэд нөхөрсөг тэмцээнд оролцож гурав нь алт, мөнгө, хүрэл медалийн эзэд болжээ.

Сахагийн “Триумф” ордонд тавдугаар сарын 26-27-нд Монгол, Якут, Казахстаны бөхчүүдийн дунд нөхөрсөг тэмцээнийг 61 кг, 65 кг, 70 кг, 74 кг, 86 кг гэсэн таван жинд  явууллаа. Ирэх сард Ингушийн Назрань хотод болох ОХУ-ын АШТ-д оролцохоор бэлтгэлээ базааж байгаа Якутын шилдэг бөхчүүд тус тэмцээнд хүч үзсэн байна.

Манай бөхчүүдээс “Арслан” клубын тамирчин, ОУХМ З.Занабазар Якутын Николай Иванов, Дмитрий Аксенов нарыг ялж алтан медалийн эзэн болжээ. Харин 74 кг-д ДАШТ-ийн хошой хүрэл медальт Г.Мандахнаран мөнгө, 65 кг-д ДАШТ-ийн хүрэл медальт, гавьяат тамирчин Э.Ням-Очир хүрэл медаль тус тус хүртэв. "Арслан" клубын тамирчин ОУХМ Т.Тулга, "Харгант цамхаг" клубын тамирчин, спортын мастер Н.Амарсайхан нар медальд хүрээгүй байна. Тэмцээний медальтнуудыг 10, долоо, таван мянган рублиэр урамшуулжээ.