Монголын уул уурхайн ассоциацын гүйцэтгэх захирал Д.Энхболдоос уул уурхайн салбарын өнөөгийн байдлын талаар тодрууллаа.
-Манай улсын экспортын гол түүхий эд зэс, нүүрс зэрэг ашигт малтмалын үнэ ханш ямар байх төлөв ажиглагдаж байна вэ?
-Богино хугацаанд зэс, нүүрсний үнэ өсөх хандлага ажиглагдаж байна. Лондон болон бусад металын биржээр худалдаалж буй зэсийн нөөц бага зэрэг буурсан. Эрэлт өсч нийлүүлэлт буурсан тул үнэ огцом өслөө. Хятадын төр засгийн бодлогын хүрээнд зарим уурхай нь хаагдсан учир нүүрсний үнэ нэмэгдсэн. Мөн өвлийн улирал эхэлж байгаа тул томоохон хотуудын гангийн үйлдвэрүүдийг дахин зогсоох эсэх шийдвэрээс нүүрсний үнэ ихээхэн хамаарна.
-Ашигт малтмалын экспорт ямар хэмжээнд байна вэ?
-Энэ оны эхний хагас жилд ашигт малтмалын экспортын хэмжээ буураагүй. Зарим ашигт малтмалын экспорт нэмэгдсэн. Гэвч мөнгөн орлого нь буурсан. Гэхдээ гуравдугаар улирлаас ашигт малтмалын үнэ огцом өсч байна. Иймд жилийн эцэст ашигт малтмалын экспортын орлого өссөн дүнтэй гарах байх гэж харж байгаа.
-Манай улсын уул уурхайн салбарт орж ирэх хөрөнгө оруулалт ямар байгаа вэ?
-Уул уурхайн салбарт хөрөнгө оруулалт төдийлөн нэмэгдэхгүй байна. Энэ жилийн “Дисковер Монголиа” чуулга уулзалтад Монголд хөрөнгө оруулсан компаниуд л оролцож байгаа. Тэд төр засгийн бодлого чиглэлийн талаар мэдээлэл авах, солилцох зорилогтой юм. Монголд хөрөнгө оруулах нөхцөлийг судалсан, хөрөнгө оруулалт хайсан ганц нэг компани бий.
-Хайгуулын салбар зогсонги байдалд орсон гэж болно. Энэ салбарт хөрөнгө оруулалт бас зогссон гэж ойлгож болох уу?
-Ц.Элбэгдорж Ерөнхийлөгч болоод хайгуулын лиценз олгохыг зогсоосон. Үүнээс хойш хайгуулын хөрөнгө оруулалт зогссон гэж болно. Хайгуулын компаниудын үйл ажиллагаа явуулах хугацаа нь дууссан. Сүүлийн зургаан жилд хөрөнгө оруулаг нар манай улсын бодлого, хууль эрх зүйн орчиноос шалтгаалж харзанасан байдалтай байна.
-Ашигт малтмал, газрын тосны газрын хайгуулын лиценз олгох асуудал нь техникийн сааталаас шалтгаалж зогссон гэж байгаа. Энэ асуудлыг шийдсэн юм болов уу?
-Өнгөрсөн жилээс хайгуулын лиценз олгож эхэлсэн. Гэвч энэ он гарснаас хойш хайгуулын лиценз олгоно гэж ярьж ирсэн. Тэгээд олгох гэж оролдсон ч систем нь ажиллахгүй болсон. Мөн бусад шалтгааны улмаас лиценз олгохоо зогсоогоод байна. Техникийн энэ саатал нь хөрөнгө оруулагчид, компаниудад ойлгомжгүй байдал үүсгэлээ.
