10 наснаасаа бүргэд сургаж эхэлсэн охины амьдралаас сэдэвлэсэн “Бүргэдтэй анчин” кино энэ сарын 2-нд АНУ-ын Нью-Йорк хотноо болсон Азийн нийгэмлэгийн их наадмаас “Ази тивийг өөрчлөгч иргэн” хэмээх шагнал хүртсэн билээ.

Тэгвэл өнөөдөр “Бүргэдчин охин” нэрээрээ алдаршсан Н.Айшолпаныг Монгол Улсын Ерөнхий сайд У.Хүрэлсүх хүлээж авч уулзан баяр хүргэсэн байна. Уулзалтын эхэнд Ерөнхий сайд У.Хүрэлсүх “”“Бүргэдтэй анчин” маш сайхан кино болсон байна билээ. Дүүдээ баяр хүргэж, улам их амжилт хүсье” хэмээн хэлжээ.

Түүнчлэн “Эмэгтэй хүн ямар агуу хүч тэнхээтэй, эр зоригтой, хурдан шаламгай, дайчин давшингуй, тэсвэр тэвчээртэй байдаг юм бэ гэдгийг миний дүү дэлхий ертөнцөд харуулж, улсынхаа нэрийг таниулж байна. Дүүдээ Монгол Улсын Засгийн газрын нэрийн өмнөөс болон хувиасаа талархал илэрхийлье.

Эрэлхэг зоригтой охин өсгөж хүмүүжүүлсэн аав, ээждээ Ерөнхий сайдын мэндийг хүргээрэй” гэжээ. Дашрамд сонирхуулахад, тус кинонд тоглосных нь дараагаар түүнд Харвард болон Лондонгийн их сургуулиас суралцах эрх олгон, оюутнаар элсүүлэх хүсэлтээ ирүүлжээ.