Хүндийн өргөлтийн насанд хүрэгчдийн улсын аварга шалгаруулах тэмцээн Спортын төв ордонд болж аваргуудаа тодруулсан.Эрэгтэйчүүдийн 64, эмэгтэйчүүдийн 21 дэх удаагийн тус тэмцээнд 16 багийн 180 гаруй тамирчид өрсөлдөж, эрэгтэй найм, эмэгтэй долоон жинд хүчээ сорьж шилдгүүдээ шалгаруулсан юм. Тус тэмцээнд Онцгой байдлын ерөнхий газрын харъяа Аврагч биеийн тамир техник-спортын хорооны баг тамирчид амжилттай оролцож эмэгтэй баг 1-р байр, эрэгтэй баг 2-р байр эзэлсэн амжилтыг үзүүлжээ.
Түүнчлэн Улсын аварга шалгаруулах тэмцээний шилдэг эрэгтэй тамирчнаар Сэлэнгэ аймгийн Онцгой байдлын газрын Сайхан сумын ГТУА 61-р ангийн дэд ахлагч Б.Цэнд-Аюуш шалгарав. Тэрбээр 94 кг-ийн жинд алтан медаль хүртсэн бол спортын мастер н.Бат-Эрдэнэ мөн жингийн мөнгөн медалийн эзэн болсон байна.
Мөн эмэгтэйчүүдийн 48 кг-д ОУХМ Б.Тунгалаг алтан медаль, 53 кг-д ОУХМ Н.Нямзул алтан медаль, 63 кг-д ОУХМ Г.Анужин алтан медаль, 58 кг-д ОУХМ О.Баярцэцэг мөнгөн медаль, +75 кг-д ОУХМ Э.Билэгсайхан алтан медаль, -75 кг-д Анхныбаяр мөнгөн медаль, эрэгтэйчүүдийн 62 кг-д Ч.Чинхүсэл мөнгөн медаль, 69 кг-д спортын мастер н.Баярням мөнгөн медаль, 77 кг-д спортын дэд мастер н.Баянмөнх хүрэл медаль, 85 кг-д спортын мастер М.Гантулга алтан медаль, н.Дорждагва мөнгөн медаль тус тус хүртжээ.