Монголын үндэсний олимпийн хорооны Дэд ерөнхийлөгч Ц.Дамдин Олон улсын Пауэрлифтингийн холбооны Ерөнхийлөгч Гастон Параге болон Азийн холбооны Ерөнхийлөгч Фаршид Солтани тэргүүтэй төлөөлөгчдийг хүлээн авч уулзлаа.
Уулзалтаар Монгол улсад Пауэрлифтингийн төрөл эрчимтэй хөгжиж олон улсын чанартай тэмцээнүүдэд өндөр амжилт гаргаж буйг онцлон, сонирхогч, хичээллэгчдийн тоо тогтмол өсөж байгааг сайшаав. Мөн Пауэрлифтингийн төрөл олимпийн төрөлд багтах, тамирчдын допингийн хяналтын тухай санал бодлоо солилцож цаашид олон талаар хамтран ажиллахаар хэлэлцлээ.
Олон улсын Пауэрлифтингийн холбооны төлөөлөгчид нь ирэх 10 дугаар сард Монгол Улсад Пауэрлифтингийн мастеруудын дэлхийн аварга шалгаруулах тэмцээн зохион байгуулах болсонтой холбогдуулан Монгол улсад айлчлал хийж байгаа бөгөөд тэмцээнийг амжилттай зохион байгуулахыг хүсэн ерөөв.