Мэргэжлийн сүмогийн нэгдүгээр сарын буюу Хацу башёд эхний 10 өдөр дарааллан давсан Какүрюү М.Ананд сүүлийн 5 өдрийн дөрөвт нь өвдөг шороодсоноор башёг өндөрлүүлсэн. Учир нь тэрээр зүүн хөлийн шагайгаа гэмтээсний улмаас түрүүлэх боломжоо Точиношинд алдсан билээ. Тэгвэл Какүрюү аварга пүрэв гарагт зүүн хөлийн шагайны орчимд мэс засал хийлгэжээ. Хагалгаа амжилттай болсон талаар түүний багш мэдэгдсэн байна. Гуравдугаар сарын барилдаандаа амжихын тулд хагалгаагаа эрт хийлгэсэн нь энэ гэнэ.
Түүний хувьд бэртлийн улмаас дөрвөн башё өнжсөн ч нэгдүгээр сарын барилдаанд 11 даваа авсныг нь сүмо сонирхогчид хангалттай сайн барилдсан гэж дүгнэж байгаа аж.