Маэгашира Таканоиваг зодсон гэх хэргээсээ болж зодог тайлсан ёкозүна Харүмафүжи Канагава мужид байдаг Изүми Ояаширо гэдэг сүмд болсон Японы уламжлалт баяр “Mame maki” ёслолд оролцжээ. Хэдийгээр аварга маань зодог тайлсан ч дэвжээнийхээ албан ёсны арга хэмжээнд нэр хүндтэйгээр оролцсонд олон хүн талархаж, мөн бахархан хүлээж авчээ. Олны хайр хүндлэлийг хүлээсэн жинхэнэ аварга хүн гэцгээж байсан аж.
Ямартай ч аваргын зодог тайлах ёслол хэдийд болох талаар тов гараагүй байгаа ч Ёкозүна, озэки цолтой бөх зодог тайлахад холбооноос өгдөг мөнгөн тэтгэмжийг нь 30 хувиар хасах шийдвэрийг энэ сарын 1-нд болсон Японы сүмо бөхийн холбооны тэргүүлэгчдийн хурлаар гаргасан байгаа.