Чөлөөт бөхийн дэлхийн таван удаагийн аварга, ЗХУ-ын гавьяат тамирчин, Дагестаны алдарт бөх Али Алиевын нэрэмжит эрэгтэйчүүдийн ОУТ ирэх амралтын өдрүүдэд ОХУ-ын Каспийск хотод болно. 49 дэх удаагийн дэх удаагийн уламжлалт тэмцээнд манай улсаас “Хасу-Мегастарс” клубийн зургаан тамирчин хүч үзэхээр болжээ.
Монголын чөлөөт бөхийн холбооны гадаад хамтын ажиллагааны дүнд "Хасу Мегастарс" клубийн тамирчид хоёр дахь удаагаа хамтарсан бэлтгэл, тэмцээнд оролцож байгаа юм.
Монгол Улсын гавьяат тамирчин Пүрэвжавын Өнөрбат, ОУХМ Батсайханы Нэмэхбаяр, Баасанцогтын Өлзийсайхан, Энхтуяагийн Тэмүүлэн, спортын мастер Алтансувдын Мөнх-Эрдэнэ, Батсуурийн Наранболд зодоглоно. Тэд Дагестанд 14 хоногийн хамтарсан бэлтгэл хийж байгаа бөгөөд тэндээсээ шууд Каспийскийн дэвжээнд зодоглоод эх орондоо ирнэ. Тус тэмцээнийг манай улсаас олон улсын шүүгч Ж.Лхагвасүрэн дэнслэх юм.