Финланд улсын Ванта хотод пауэрлифтингийн залуучууд, насанд хүрэгчдийн хэвтээ шахалтын хэрэглэлгүй төрлийн ДАШТ болж, Монголын баг тамирчид алт, хүрэл медалийн тавцанд гарлаа. Энэ тэмцээнд Монголын пауэрлифтингийн нэгдсэн холбооны таван тамирчин өрсөлдөхөд насанд хүрэгчдийн 105 кг-ын жинд “Рио-2016” паралипын наадмын хүрэл медальт, гавьяат тамирчин Э.Содномпилжээ 237.5 кг-ыг шахснаар алтан медаль хүртэж, дэлхийн аварга болов. Э.Содномпилжээ тус амжилтаараа дэлхийн дээд амжилтыг шинэчилсэн бөгөөд дараагийн захиалгаа 242.5 кг болгон даалгавараа амжилттай гүйцэтгэснээр дэлхийн рекордыг нэг дор хоёронтаа шинэчилсэн байна. Мөн тус тэмцээний залуучуудын 66 кг-д Э.Галбаяр 155 кг-ыг шахснаар хүрэл медалийн тавцанд гарчээ. Э.Содномпилжээгийн хувьд он гарсаар дэлхийн цом, ДАШТ-ээс алтан медаль хүртэж байгаа нь энэ.