Дархан аварга Х.Баянмөнх бөхчүүдийн допингийн асуудлаар өнөөдөр АТГ-т ханджээ. Тэрээр АТГ-т өргөдөл өгснийхөө дараа сэтгүүлчдийн асуултад хариулахдаа "Допинг гэдэг сүүлдээ бөхчүүдийн эрх ашгийг хохироох, сэтгэл санаагаар унагах, нэр төрийг нь гутаах, наадмын бэлтгэлийг нь хүчингүйдүүлэх хэрэгсэл болж байна. Би допингийг хориглохыг дэмжинэ. Бидний үед С витаминаас өөр юм хэрэглэдэггүй байсан. Допингийг ямар хүн хийгээд бөхчүүдийн биед мэдрэлгүй болтол шахаад байна вэ.

Наадмаас наана эвлэрлийн гэрээ байгуулаад бөхчүүд нэг холбоо болж наадмаа сайхан хийе гэдэг саналыг гаргасан. Монголчууд баяр наадмаа хийж чаддаг улс. Хэрвээ хийж чадахгүй бол үндэсний аюулгүй байдалд ч нөлөөлж мэднэ. Баяр наадмаар онцгой байдал үүсч магадгүй" гэв.