“Хятад орныг танин мэдэх”-Өвөрмонголын соёл, аялал жуулчлалын өдрүүд манай улсад болж буй. Энэ соёлын өдрүүдийн арга хэмжээний нэг хэсэг болох “Хятадын кино өдрүүд” мягмар гарагт ”Их Шанхай” киногоор нээлтээ хийсэн билээ. Энэ сарын 8-ныг хүртэл үргэлжлэх кино өдрүүдээр Хятадад орлогоороо тэргүүлдэг “Их хотын хайр”, “Хүн загас”, “Надтай гэрлээч”, “Хайр нэхсэн зүүд”, “Зурагчин хүү”, “Шулам дарсан үлгэр”, “Тансаг ламын үлгэр” зэрэг арван киног “Тэнгис”, “Гэгээнтэн”, “Өргөө”, “Соёмбо” “Icinema” кино театруудын дэлгэцнээ үнэ төлбөргүйгээр гаргах юм. 10 шилдэг киноны 5 нь халх аялга, 5 нь Өвөрмонгол дуу оруулалттайгаар үзэгчдэд хүрэх бөгөөд эх хятад хэлнээс нь шууд монгол хэл рүү хөрвүүлж, алтан үеийн орчуулгын киноны стандартаар ам барьж дуу оруулсан болохоор үзэхэд илүү амттай байх болно хэмээн дуу оруулагч нар нь уламжилсныг дуулгахад таатай байна.
Мөн кино өдрүүдийн хүрээнд Монгол, Хятадын кино урлагийн хамтын ажиллагааг эхлүүлж Өвөрмонголын кино группийн хамт олон Улаанбаатар хотын таван кино театртай хамтран ажиллах түншлэлийн гэрээ байгуулсан юм. Ингэснээр хоёр орны кино урлагийн уран бүтээлчид цаашид хамтарч кино хийх, театрууд нь киногоо солилцох, хамтарч кино орчуулах зэрэг бүхий л шат дамжлагыг хамтдаа хийх нөхцөл боломж бүрдэв.
Мөн ТВ2 телевизэд Хятадын шилдэг олон ангит “Дэггүй аав” киног бэлэглэсэн гээд энэ удаагийн Хятадын кино өдрүүдин арга хэмжээ хоёр улсын найрамдлын хэлхээ холбоог улам бататгаж өгөв. Энэ дашрамд сонирхуулахад, маргааш найруулагч Янь Фэй, Пөн Да Мо нарын “Хайр нэхсэн зүүд” нэртэй инээдэм, адал явдалт киног 19:00 цагаас, найруулагч Жун Жы Шиний бүтээл “Шидэт бийрт зураач хүү” адал явдалт, 3D хүүхэлдэйн киног 15:00 цагаас үзэх боломжтой юм.
